दोस्रो जन्मदिनमा प्रसिद्धिलाई चिठी

प्रिय प्रसिद्धि, 

ह्यापी बर्थ डे । आज तिमी २ बर्षकी भयौ । तिम्रा लागि (र, हाम्रो लागि पनि) जसरी पहिलो बर्ष निकै रोचक भए, दोस्रो बर्ष उत्तिकै रोमाञ्चक पनि । केही हप्ता अघिमात्र तिम्रो बुवाममीसाथ हामी मनकामना, सौराहाहुँदै बुटवलसम्म सँगै घुमेर फर्केका थियौं । तिमी यसरी हिंड्न र बोल्न जानेपछि तिमीसँग गरेको त्यो मेरो पहिलो लामो भ्रमण थियो । त्यो मेरा लागि कम्ता रमाइलो भएन । हामी सँगै हात्ति चढ्यौं, डुङ्गामा सयर गर्दै राप्ती नदिमा गोहीहरु गन्यौं । ति ठाउँहरु त म पहिले पनि घुमिसकेकै हुन् तर तिमीसँगको यात्राले पुरानै र सामान्य ठाउँ भए पनि यात्रा निकै अविश्मरणिय बन्न पुगे ।

दोस्रो बर्षमा तिमी यसपटक स्कुल पनि गयौ । थाहा छ प्रसिद्धि, तिमी भर्ना भएको पहिलो स्कुल देशकै ठूलो अफिस सिंहदरवारभित्र थियो । तर जाडो याम शुरु भएपछि चिसोले भेट्ला भनेर पछि तिम्लाई घरमै राखियो । तिमी ममी–पापासँगै जाडोयाममा सिरक ओडेर पढ्न खोज्थ्यौ । तिम्रो लागि भनेर पापाले एउटा छुट्टै कपी–कलम छुट्याइदिनु भएको छ जसमा तिमी आफ्नै पाराले लेख्न थाल्यौ । हुन त तिमी अझै अक्षर लेख्न सक्ने त भएकी छैनौं तर तिम्ले त्यतिधेरै उत्साह र लगनशीलता देखाएर कोर्ने सिधा–बाड्गे धर्काहरु मलाई कुनै ठूलै चित्रकारले बनाएको विश्वप्रसिद्धि चित्रझैं लाग्थे ।

त्यसै त औधी राम्री तिमी, अहिले हिंड्न र बोल्न सक्ने भएपछि तिम्रो सुन्दरता झन् बढि खुलेको छ । हिंड्न सक्ने भएकै कारण आजकल म तिम्रो घरमा आउँदा झ्यालको पर्दा, सिरक भित्र र ढोकाको कुनामा लुकेर ‘चोर पत्ता लगाउ’ खेल्न सम्भव भइसकेको छ । तिमीमा आफ्नो र अरु छुट्याउने विचित्रको शक्ति छ । तिमीले मलाई मात्र ‘मामाजी’ भनेर सम्बोधन गर्छौ भने तिम्लाई भान्जी भने अरुलाई ‘मामा’ मात्र । तिम्ले अहिले पापा, ममी, सानोपापा, सानोमामु, मेरो र भाईबहिनीहरुको पूरा नाम जानीसकेकी छ्यौं । पापा र ममीको मोवाइल नम्बर तिमी सिक्न खोज्दै छ्यौ, सायद अबको एक–दुई महिनाभित्रै जान्नेछ्यौ । तिमीलाई अहिले पापाको अफिसको नाम र पद सजिलै भन्न आउँछ । ‘ताराबाजी लैलै’, ‘इक्कल–दुक्कल तिक्कल चार’, ‘जोनी जोनी एस पापा’, ‘चि..मुसी..ची’ जस्ता थुप्रै गीत गाउन जानिसकेकी छौ । अझ तिम्लाई अलिअलि हिन्दी र नेपाली फिल्मका गीत पनि आउन थालिसकेको छ । ‘ओलाला ओलाला’, ‘सिम्पल सिम्पल’ तिम्लाई राम्ररी गाउन आउने गीतहरु हुन् । पछिल्लो तीजमा तिमी हामीसँग यती राम्ररी नाच्यौ, हामी सबै छक्कै पर्नेगरी । तिम्रो फोटो त यसपटक पत्रिकामा पनि छाप्पिसक्यो । नागरिक दैनिकले तिम्लाई जन्मदिनको शुभकामना भनेर लेख्यो । तिमी चौधरी ग्रुप, सानेपा पुगेर उसले दिने उपहार एक कार्टुन वाईवाई पनि लिग्यौ । 

पहिलो जन्मदिनमा प्रसिद्धिलाई चिठी

प्यारी भाञ्जी,

 तिमी आज १ बर्षकी भयौ । जन्मदिनको धेरैधेरै शुभकामना । अहिले त तिमी लेख्न, पढ्न जान्ने भइसकेकी छैनौ । तिमीले बोल्न जानेको पनि पापा, मामा, ममी, मात्रै हो । तर तिमीले भब्य सफलतापूर्वक पार गरेको यो १ बर्षले तिम्रो पूरा जीवनको संकेत गरिरहेको मैले देखिरहेको छु । तिमी पढ्न जान्ने भएपछि यो पत्र पढ्नेछ्यौ, आफूलाई मामाको आँखाबाट पनि चिन्नेछ्यौ र एउटा  असल र सफल व्यक्ति हुन सदा लालायित हुनेछ्यौ ।

तिमी गतबर्ष जन्मदाँ तिम्रो बुवा अधिकृत पास हुनु भएको दुई दिन मात्र भएको थियो । अरुहरुले तिम्रो बुवालाई जिस्क्याउँथे, ‘बाबा अधिकृत नभइकन म जन्मिन्न भनेर नानी आमाको कोखभित्रै कुरेर बसेकी रैछिन्, अब खुसीसाथ जन्मिन्छिन् ।’ भयो पनि त्यस्तै तिमी जन्मिएपछि घरमा अर्को खुसी थपियो । तिम्री आमा तिम्लाई जन्माउनु अघि निकै आत्तिरहेकी थिइन्, हामीहरु अस्पतालको प्रशुतिगृह बाहिर एकटकले भगवानलाई पुकारीरहेका थियौं । तिम्रो घर र मामाघरबाट तारम्तार फोनहरु आइरहेका थिए । तिमी जन्मिएपछि सबैले लामो शास फेरे । तिम्री आमाले पुर्नजन्म पाएको अनुभव गरिन् । अथाह पीडाका बावजुत उनी निकैबेर तिम्लाई छातीमा राखेर सुम्सुम्याइन् । भाञ्जी, तिम्लाई बताउँ, तिम्री आमा त्यतिधेरै खुसी भएको मैले त्यसअघि देखेकै थिइन ।

तिमी सानैदेखि बिलक्षण र बिशेष थियौ । बिलक्षण कोही बिशेष आविस्कार गर्दैमा मात्र मापन गरिँदैन । सच्चा बिलक्षणता उसको दिनचर्याले बोलिरहेको हुन्छ । तिमी सानैदेखि त्यस्तै थियौ । तिमी सानैदेखि परिस्थिति आत्मासाथ गथ्र्यौ, जति भोकाउँदा पनि ‘एकैछिन पर्ख ल’ भन्दा धैर्यतासाथ हाँस्दै कुरेर बस्थ्यौ, एकोहोरो रोइरहने तिम्रो स्वभाव झनै थिएन । तिम्रो अर्को विशेषता सबैखाले मानिससँग सजिलै झ्याम्मिन सक्नु पनि हो । मलाई अझै याद छ, गाडिमा कतै यात्रा गर्दा छेवैमा बस्ने अन्य यात्रीहरु तिमीबाट निकै प्रभावित हुन्थे ।

तिमी निस्फिक्री उनीहरुसँग खेल्थ्यौ । त्यसैले बिछोडिँदा धेरैका आँखा तिम्लाई हेरेर रसाउँथे । सबैले तिम्लाई केही न केही किनिदिन्थे त कसैले तिम्रो हातमा पैसा राखिदिन्थे । तिमीसँग त्यस्तो एउटा चुम्मकिय शक्ति छ ।  तिमीसँग झण्डै एक महिना बिताएपछि घर फर्कँदा तिम्री जिजुआमालाई निकै गाह«ो भएको थियो । भाञ्जी, तिमीलाई बताउँ, तिम्री मावली जिजुआमा निकै ‘बोल्ड’ महिला हुनुहुन्छ । तिमी ममी र हामीहरु हाम्री ममीभन्दा बढि उनै जिजुआमाको समिपमा रहेर हुर्कियौँ । उहाँले कत्ति पढ्नुभएको छैन । तर अनुभव र दुःख–सुखसँग पैँठेजोरी खेल्दा निकै बलियो महिला हुनुभएको हो । सितीमिती वहाँ रोहेको मैले देखेकै थिइन, जुन तिम्लाई काठमाण्डौंमै छाडेर जाँदा देखेँ । म आजकल त्यही भएर तिम्रो घरमा लामो समय बस्न मन लाग्दैन, तिमीसँग रिसाएर होइन कि लामो समय सँगै बसेर फेरी मेरै घर फर्कँदा तिम्रो सम्झनाले झनै पिरोल्छ ।

मैले अघि नै भनिसकेँ, तिमी सानैदेखि ‘मेचुअर’ थियौ । हुन पनि तिम्रो दाँतहरु पाँच महिना नपुग्दै आइसकेका थिए । अहिले त तिम्रा दाँतहरु धेरै नै आइसकेका छन् । आफ्नो शरीर धान्नै नसक्ने अवस्थामै पनि तिमी चारपाउ टेकेर हिड्थ्यौं । सात महिनाकै हाराहरीमा तिमी भित्ता समातेर घरभित्र एउटा कोठाबाट अर्कोमा गइरहन्थ्यौं । तिम्लाई ‘झोलुङ्गे’ त २/३ महिनाभन्दा बढि त चाहिँदै चाहिएन । र तिम्लाई १ महिनाअघि देख्दा त तिमी हिँडिरहेकी थियौ । तिमी बाबासँगै बिहान दुधपसल पुगेर दुध ल्याउन थालिछौ । दुवै हातमा केही न केही बोकेर हिँड्न थालिछौ । तर तिमी जब लड्छ्यौ, तिम्ले आफ्ना दुवै हातमा बोकेका सामानहरु छाड्दिनौ, जसले गर्दा उठ्न तिम्लाई गाह«ो पर्दौ रहेछ । तिम्रा यस्ता धेरै स्वभावहरु निकै प्यारा छन् ।