द इन्ट्री गेट

२०६७ ले कोरेको बाटोमा हिंड्दै २०६८ लाई प्रस्थान विन्दू बनाएका तीन पात्रहरुसँगको भलाकुसारी

राजन उप्रेती, ३०, को लागि २०६८ कुनै नयाँ काम शुरु गर्ने बर्ष हुने छैन । विगत १४ बर्षयता नाटक क्षेत्रमा जमेका उनी यस बर्ष पनि पहिलेझैं अभिनय र निर्देशनमै रमाउँनेछन् । ‘तर पनि मेरा लागि यो बर्ष निकै चाखको बर्ष हुनेछ’, नयाँ बर्षको पूर्वसंध्यामा अनामनगरको एक कफिसपमा उनले भने, ‘कुरा अभिनयकै भएता पनि मैले शुरु गरेको नयाँ प्रयोगहरुको ‘रेस्पोन्स’ कस्तो आउँछ भन्ने मलाई जान्नु छ ।’ गत बर्ष निकै चर्चा बटुलेको चलचित्र ‘दासढुंगा’का ‘कास्टिङ डाइरेक्टर’ उप्रेती २०६८ मा अर्को चलचित्र ‘सौर्य’ मा सोही भूमिकाका साथ आउँदैछन् ।

Aastha B

ऐतिहासिक बिषयबस्तुलाई बर्तमान परिवेशमा जोडेर बनाइएको चलचित्र ‘सौर्य’मा नेपाल भारतबिचको कूटनीतिक द्वन्द्व झल्काइएको छ । ‘बिगतमा जसरी शक्तिको बलमा हतियारको साहारा लिएर युद्ध हुने गथ्र्यो अहिले त्यो त रोकिएको छ तर कूटनीतिक रुपमा छिमेकीहरुले आफ्नो हैकम र उपनिवेश झनै चर्को रुपमा उठाउन थालेका छन्’ राजनले सौर्यले उठान गरेको बिषयबस्तु बताए, ‘यही बिषयलाई चल्तीका फिल्मभन्दा भिन्न रुपबाट प्रस्तुत गरिएको छ ।’ उनी यसलाई पूर्ण व्यावसायिक वा पूर्ण क्लासिकल कुनैको पंक्तिमा पनि राख्न चहान्नन् । राम्रो चलचित्र ‘स्टार कास्ट’ नै नभइकन हुँदैन भन्ने आम मान्यता यसमार्फत झनै भत्कने उनी ठान्छन् । भन्छन्, ‘अवस्था हेरिकन कतिपय अवस्थामा अभिनय नपढेका वा त्यसअघि फिल्म नै नखेलेका सर्वसाधारणबाट झनै राम्रो प्रस्तुति निकाल्न सकिन्छ ।’ उनले सौर्यमा गरेको पनि त्यसै हो । उनी २ महिना बढि समय फिल्म सुटिङ गरिएको क्षेत्र पूर्वी नेपालको इलाम बजार, माइपोखरी र सुन्दुकपुरमा बिताए । त्यो फिल्म सुटिङकै लागि मात्र भन्दा पनि स्थानिय जनतासँग घुलमिल भएर स्थानिय पात्र चयन गर्नुको लागि पनि थियो । फिल्ममा राजेश हमाल पनि छन् । तर त्यो स्टार कास्टको कारण नभइकन कथाले खोजेजस्तो मान्छे भएको उनको तर्क छ । 

Rohit Chand

उनले ‘शारीरिक अभिनय’मा राष्ट्रिय नाचघरबाट दक्षता हाँसिल गरेका हुन् । फलस्वरुप गुरुकुलमा उनका ४० बढि नाटकहरु प्रदर्शन भइसकेका छन् । केही समय अघि मात्रै ‘द फेमस एण्ड ट्यालेन्ट २०११’ मा उनले  लक्ष्मीप्रसाद देवकोटाको ‘मुनामदन’ लाई एकल अभिनयमा देखाएका थिए । गुरुकुलमा उनी आफैले लेखन, निर्देशन तथा एकल अभिनय गरेको मध्ये ‘बाँकी उज्ज्यालो’ र ‘सहिद नं २००६’ निकै रुचाइएका काम हुन् । 

नेपाली चलचित्रहरु बर्षेर्नी खस्किंदै गइरहेको आरोप आइरहँदा राजनजस्ता केही सिर्जनशील व्यक्तिहरु नयाँ प्रयोग ल्याउन कस्सिएका छन् । ‘तर त्यो एकैपटकमा सम्भव छैन्’, उनले सुनाए, ‘हाम्रा यी प्रयोगहरु मन्द बिषजस्तै हुन् जुन थाहै नपाएकन केही बर्षभित्र पूर्ण काम गर्न थाल्छन् ।’

राजनजस्तै चल्तीको ढर्राभन्दा फरक प्रयोग गर्दै अघि बढ्नेमै पर्छिन गायिका आस्था बि । आजभन्दा ४ बर्षअघि नै भुषण दाहालद्वारा निर्देशित ‘आँखामा आँशु’ बोलको म्युजिक भिडियोमा यी १८ बर्षेले स्वर दिएकी थिइन् । २०६८ को शुरुवातसँगै अहिले उनको दोस्रो एकल ‘एल्बम’ बजारमा ल्याउँदैछिन् । ‘नाम चाहीँ अहिल्यै नभनिहालौं’, आस्थाले मन्द मुस्कानसाथ भनिन्, ‘तर यो युवाहरुदेखि बुढापाकाहरुसम्मले रुचाउने खालको हुनेछ ।’ शुरुमा ‘पपरक’ बढि गाउने उनले अहिले मेलोडि, रक एण्ड रोल, पपजस्ता धेरै विधामा आफ्नो कला देखाएकी छिन् जसमा बुनिएका गीतहरु पनि प्रेमदेखि राष्ट्रियतासम्मका छन् । यसअघि उनको ‘आस्था’ एल्बम बजारमा आएको थियो जसको ‘तिमी नै छ्यौ’ बोलको गीतले ‘पप रक फिमेल भोकलिस्ट’ तर्फ इमेज अवार्ड पनि जितायो । त्यस एल्बमकै ३ गीतहरुका म्युजिक भिडियो पनि बनेका थिए जसमा उनी स्वयंले मोडलिङ गरेकी थिइन् । 

हिमालयन ह्वाइटहाउस इन्टरनेशनल कलेज, नयाँबानेश्वरमा ब्यावस्थापनमा कक्षा १२ को अन्तिम परीक्षाको तयारी गरिराखेकी उनी त्यसपछिको फुर्सदमा कन्सर्टहरु गर्दै आफ्ना गीतहरु प्रबद्र्धन गर्ने सोचमा पनि छिन् । ‘नेपाली युवाहरुको अहिले पश्चिमा संगीतमा निकै चाख बढेको छ’, उनको भनाई छ, ‘त्यसैले पनि पश्चिमा र नेपाली संगीतको फ्युजन गर्दै मैले गायन करिअरलाई बढाइराखेकी छु ।’   

उता नेपाली राष्ट्रिय फुटबल टिमका डिफेन्डर रोहित चन्द, २०, सानै उमेरमा राष्ट्रिय टिममा प्रवेश पाई धेरैले रुचाएका खेलाडि मध्येका एक हुन् जसबाट २०६८ मा हुने महत्वपूर्ण अन्तर्राष्ट्रिय फुलबल खेलहरुमा निकै आशा राखिएको छ । भारतको ‘युनाइटेड एयरनोटिक लिमिटेड स्पोर्ट क्लब’ बाट ब्यावसायिक फुटबल खेलिरहेका उनी अहिले भइरहेको एएफ्सी च्यालेञ्ज कपका लागि काठमाण्डुमा छन् । राष्ट्रिय टिमका म्यानेजर कृष्णभक्त मानन्धर उनलाई ‘अलराउन्डर’ खेलाडि मान्छन् । भन्छन्, ‘ऊ एकनाशले खेल खेल्छ र हरेक पोसिनमा राम्रो छ ।’ रोहितको अर्को विशेषता भनेको दुवै खुट्टाले खेल खेल्न सक्नु पनि हो । 

भारतीय सेनामा जागिरे उनका बुवा स्वयं फुटबलर थिए जसको प्रभाव आफूमा सरेको मान्छन् रोहित । कक्षा ८ मा पढ्दैगर्दा सुर्खेतबाट छानिएर काठमाण्डु छिरेका उनी त्यसयता आफ्नो खेल करिअरमा दिनानुदिन अब्बल साबित गरिरहेका छन् । ५ बर्ष एन्फा एकेडेमीमा रहेर खेलमा थप निखारता ल्याएका उनको तत्कालको सपना नेपाललाई विश्वकप खेल्नका लागि छनौट चरण पार गराउनु छ जसको लागि यसैबर्ष भाग्यपरीक्षा हुँदै छ । ‘हाम्रो टिम राम्रो खेल्दाखेल्दै पनि स्कोरिङमा चुकिरहेको छ जसलाई हामी सक्दो मिहिनेतले मेटाउने प्रयासमा छौं’, उनले भने, ‘त्यसबाहेक फुटबललाई सुधार्न देखभित्र खेलको नाममा राजनीति पनि रोकिनु पर्छ ।’ २०६८ मा नेपालले खेल्ने प्रमुख अन्तर्राष्ट्रिय खेलहरु ‘दक्षिण एसियाली फुटबल (साफ)’, ‘दक्षिण एसियाली खेल (साग) को फुटबल’ र विश्वकप छनौट खेलहरु हुन् । २००९ मा राष्ट्रिय टिममा प्रवेश पाएका उनी अब आफ्नो भूमिका देखाउने बेला आएको ठान्छन् ।

राजन, आस्था र रोहित फरक फरक क्षेत्रका प्रतिभा भएता पनि बेग्लै सिर्जनशीलता र क्षमता बोकेका तन्नेरीहरु हुन् जसले बितेका कयौं बर्ष आफ्नो मिहिनेत एउटा सुन्दर सपनाकै लागि गरेका थिए । ति सपनाप्राप्तीको बाटोमा २०६८ झनै फलदायी होस् । हेलो शुक्रबारको शुभकामना ।  

This was originally appeared in Hello Shukrabar (KANTIPUR) dated 2nd of Baishak, 2068.