पहिलो जन्मदिनमा विभूतिलाई चिठी

प्रिय विभूति, 

पहिलो बर्ष सफलतापूर्वक सम्पन्न गरेकोमा तिम्लाई बधाई छ । आजकै दिन  (बैशाख २३) ठिक एक बर्षअघि तिम्रो जन्म हाम्रो लागि एउटा सप्र्राइजसाथ भएको दियो । सप्र्राइज कसरी भने तिम्री जन्मिइसकेपछि मात्र हामीकहाँ उक्त सुखद् खबर पुगेको थियो । किनभने, तिम्री मामुले डाक्टरले भनेको मिति भनेर--त्यसको अझ दुई तिन हप्ता पछिको मिति हामीलाई भनेकी थिइन । जसले गर्दा तिमी जन्मनु अगाडि हरेक महिलाले जसरी, तिम्री मामुले अनुभव गरेको पीडामा हामीले साथ दिन पाएनौं । 

तिम्रो जीवनसँग जोडिएको पहिलो शिक्षा नै त्यहीँबाट शुरु भएको थियो जहाँ तिम्री मामुले विवेकपूर्ण ढंगबाट सबैको भाग पीडा र तनाव एक्लै लिएकी थिइन् । यदि त्यसो नभनेको भए हामी धेरै जना हप्तादिन अगाडिदेखि वा कम्तिमा मामुलाई व्यथा लागेदेखि निकै चिन्तित हुन्थ्यौं जुन तिम्री मामुको विवेकपूर्ण चलाखीले गर्दा पाएनौं । हुन पनि हो, जति नै अरु चिन्तित भए पनि तिम्लाई जन्माउनु त तिम्री मामुलाई नै थियो । अरु त मात्र पीडामा साथ दिने मात्र थियो । त्यसैले तिम्रो लागि जीवनमा मामुले सिकाएको यो पाठ हमेशा शिरोधर गर्नु, ‘यो संसार भनेको तिम्रा लागि तिमी मात्र हो, अरु सबैले तिम्रा सुख–दुःखमा साथ त देलान् तर ति सब भ्रम मात्र हुन्, मुख्य काम फत्ते गर्ने तिमी नै हुनेछ्यौ । त्यसैले सबैभन्दा मुख्य काम आफैमा असल, सक्षम र विवेकी हुनु जरुरी छ ।’

शुरुमै तिमीसँग अलिक जटिल कुरा गरेझैं भयो तर तिम्रो जीवनसँग जोडिएको यस महत्वपूर्ण कुरा छुटाउन मलाई मन लागेन । 

विभू, संसारमा दिनहूँ हजारौं बच्चाहरु जन्मन्छन् । धेरै आमाको गर्भभित्रै त कति जन्मंदा जन्मदै मर्छन् । बच्चाहरु जन्मने क्रममा जडिल प्रशव पीडाले गर्दा धेरै आमाहरु मर्ने क्रम समेत उच्च रहेको हुँदा धेरै शिशुहरु जन्मंदै आमा गुमाउन पुग्छन् । त्यसपछि समेत पारिवारिक र सामाजिक पृष्ठभूमि कस्तो छ, त्यसले नै ती बालबालिकाहरुको भविष्य निर्धारण गरिराखेको हुन्छ । मैले तिमीलाई यो बताउनुको कारण के भने यस संसारमा जन्मन नै प्रथमतः मूल्यवान काम हो भने दोस्रो मूल्यवान काम राम्रो वातावरणमा हुर्कन पाउनु । तिमी दुवै मामिलामा अब्बल छ्यौ । त्यसैले मेरो ईश्वरसँग प्रार्थना छ, तिमी जीवनलाई हरेकक्षण मूल्यवान सम्झेर अगाडि बढ्नेछौ । 

तिमी यस्तो परिवारमा जन्मेकी छौं जहाँबाट जीवनका मूल्यवान कुराहरु बुझ्न सम्भव छ । तिम्रो पीताजीका कयौं राम्रा विशेषताका बिचबाट एउटा निकै अनुकरणीय छ । वहाँले घटनाक्रमलाई सधै ‘ठूलो तस्विर’ मा राखेर हेर्नुहुन्छ । वहाँले भनेको मैले सुनेको छु, ‘एउटै घटना जसलाई अरु मानिसहरुले मानिसहरुले दस बिस जनासँग तुलना गरेर हेर्छन, मैले दश बिस हजारसँग तुलना गरेर हेर्छु । त्यसैले त्यसमाथि मैले बनाउने धारण अरुको भन्दा भिन्न र मौलिक हुन्छ ।’ पीताजीले भनेझैं संसार ठूलो छ त्यसैले हामीले सोच्ने दायरा पनि ठूलो हुनुपर्छ । ससाना कुरामा तिमीले ससानै कोणबाट सोच्न थाल्यौ भने संसार झन् बढि दुःखदायी र क्रष्टकर बन्न पुग्छ । संसार यति ठूलो छ कि जहाँ हाम्रो जति नै ठूलो कुरा पनि संसारका लागि केही होइनन् । 

............

तिमी सानैदेखि धैर्य स्वभावकी छौं । तिमीमा बुझकारी गुण समेत गज्जबको छ । ममी कतै जाँदा समेत नरोइकन बस्ने परिपक्व स्वभावको गुण छ तिमीमा । हुन पनि तिमी मामुजत्तिकै हजुरआमाको स्याहारसुसार र समीपमा रहेर हुर्कियौ । मामु वा हजुरआमा कतै गएर फर्कन केही ढिलो गर्दा समेत तिमी रुने, कराउने गर्दिनौ । त्यो तिमीमा रहेको परिपक्व स्वभावको प्रारम्भिक छनकहरु हुन् । 

तिम्रो नाम नै आफैमा तिम्रा त्यस्ता असल गुणहरुको प्रतिबिम्ब दिने खालको छ । विभू भगवान लक्ष्मीका हजारौं नामहरु मध्ये धेरै उच्चारण गरिने एउटा हो जसको अर्थ धन, समृद्धि, प्रकाश, विवेक, भाग्य, साहश र सुन्दरता हुन्छ । मेरो ईश्वरसँग प्रार्थना छ, बढ्दो उमेरसँगै तिमीमा यस्ता गुणहरु झन् खुल्दै जानेछन् जसले तिमीलाई एउटा आदर्श व्यक्ति बन्न सहयोग पुग्ने छ । 

ह्याप्पी बर्थडे विभूति 

उहि तिम्रो

मामाजी