अनलाइनमा लोकसेवाको ट्युसन

लोकसेवा आयोगको परीक्षा दिँदै हुनुहुन्छ तर दिनहुँ इच्स्चिच्युट धाएर ट्युसन पढ्न भ्याउनुहुन्न भने पनि अब केही छैन । इन्टरनेट सञ्जालमा अहिले एउटा यस्तो साइट थपिएको छ, जसले अनलाइनबाटै इच्स्चिच्युटमै जसरी ट्युसन पढाउँछ । 

लोकसेवा गाइड डट कम लगइन गरेपछि तपाईंले पढ्न चाहेको कोर्स छान्न सक्नुहुन्छ र सोही अनुसार तपाईँ दिनहुँ घरमै बसीबसी उनीहरूले पढाउने सामग्री अध्ययन गर्न सक्नुहुन्छ । यसरी पढ्दाको पैसा पनि इच्स्चिच्युटको भन्दा झन्डै तीन भाग सस्तो पर्छ । भर्ना भएपछि विद्यार्थीले एउटा युजरनेम र पासवर्ड पाउँछन्, जसको प्रयोग गरेर ट्युसन अवधिभर इन्टरनेटको पहुँच भएको जुनकुनै ठाउँबाट पढ्न सकिन्छ । तर, एकपटकमा एक जनाभन्दा बढीले यसरी प्रयोग गर्न सक्दैनन् र उपलब्ध गराइएका ती सामग्री कपी गर्न वा पि्रन्ट गर्न पनि मिल्दैन । कुनै दिनको ट्युसन छुटिहालेमा पनि त्यस अवधिभर अघिल्ला दिन प्रेषित गरिएका सामग्रीसमेत पढ्न मिल्छ । त्यसैले विद्यार्थी नहुने भए तापनि लोकसेवा गाइडको कार्यालय, शंखमूलमा भने शिक्षक सामग्री लोड गर्नमा व्यस्त हुन्छन् ।

यस साइटमा कोर्सको बाँडफाँट गरेर सामग्री राखिन्छ, जुन विद्यार्थीले आफ्नो आवश्यकताको कोर्सको कुनै अंश मात्रको पनि ट्युसन पढ्न सक्छ । आफूले नबुझेका प्रश्नहरूसमेत अनलाइनबाटै गर्न सकिन्छ । ऐन, नियम, पुराना प्रश्न, राष्ट्रिय तथा अन्तर्राष्ट्रिय परिवर्तनहरूजस्ता केही कुरा विद्यार्थीका लागि नि:शुल्क पनि राखिएको छ ।"यसले जागिर गरिराखेका वा ट्युसन इस्टिच्युटसम्म पहुँच नभएका दुर्गम भेगका व्यक्तिलाई सहयोग पुर्‍याउँछ," साइटका शिक्षक तथा शाखा अधिकृत यदु नेपाल भन्छन्, "अहिले लोकसेवाका कोर्सहरूमा कम्प्युटर सीपलाई अनिवार्यजस्तो बनाउँदै लगिएको पनि छ, जसले विद्यार्थीलाई कम्प्युटरमैत्री हुनसमेत सहयोग गर्नेछ ।"

This appeared in Print at NEPAL magazine dated Aug 21, 2011